Cun in egl preoccupant guarda la Svizra vers la Gronda Britannia e l’Irlanda. La mutaziun dal coronavirus sa derasa fermamain. Uschia èn las cifras d'infecziun en l'Irlanda sa multiplitgadas per 4 en in'emna. La mutaziun chaschuna tenor il BAG per infecziuns era là nua ch'i dat concepts da protecziun. Fin mardi han ins pudì confermar 127 cas da mutaziuns - 86 da la Gronda Britannia, 5 da l'Africa dal Sid e 36 anc betg identifitgadas.
Pervia dal ristg pli grond d'infecziuns e las cifras ch’èn anc adina autas en Svizra vul Alain Berset dapli mesiras tenor las funtaunas. Concret veglia el proponer il suandant al Cussegl federal:
- Serrar butias e martgads ch'èn betg relevants per il mintgadi.
- Manaschis sco coiffeurs duain survegnir in'ura da polizia da las 19 fin a las 6.
- Dapli Homeoffice: dapertut nua ch'igl è pussaivel.
- Mascras dapertut en dadens era sch'i dat avunda distanza.
- Maximalmain 10 persunas tar inscunters dadens ni dador.
Quellas mesiras sajan il minimum. Da serrar hotels, territoris da skis e manaschis sco per exempel coiffeurs n'è betg exclus.
Novas mesiras diras èn dentant pauc probablas
Quai è dentant il plan dal Cusseglier federal Alain Berset. Per prender ina decisiun dovri la maioritad da tut ils 7 en il Cussegl federal. Tenor la constellaziun èsi uschia pauc probabel ch'i dat oz ulteriuras mesiras dian ils correspundents dad RTR a Berna.
Probabel èsi dentant che las mesiras existentas vegnan prolunghidas sco era che l'agid per cas dirs vegn schlargià uschia che pli blers affars han il dretg sin agid finanzial.