Siglir tar il cuntegn

Header

Butia serrada.
Legenda: Serrar butias ed ustarias na sajan betg mesiras effectivas, argumentescha il SGV. Maletg simbolic. Keystone
cuntegn

Mesiras cunter corona SGV è cunter in lockdown sever

I na saja betg cumprovà che las mesiras da serrar ustarias e stizuns sajan propi effectivas, uschia l'argumentaziun. Percunter pretenda l'Uniun d'artisanadi e mastergn dapli restricziuns tar occurenzas privatas.

L'Uniun svizra d'artisanadi e mastergn SGV refusa da prolungar las restricziuns fin ils 28 da favrer ed è cleramain cunter in lockdown sever, in'obligaziun da homeoffice e mesiras pli rigurusas per stizuns. I na saja betg cumprovà che quellas mesiras pli rigurusas sajan effectivas.

Las cifras da l'Uffizi federal da sanadad cumprovian che las infecziuns novas restian en spazis determinads bain avunda. En sia posiziun a la consultaziun da la Confederaziun scriva il SGV plinavant che restaurants, clubs da fitness etc. na sajan betg gnieus d'infecziuns.

Per restricziuns en il sectur privat

Percunter beneventa il SGV restricziuns per occurenzas privatas. Uschia duajan maximal 10 persunas or da duas chasadas pudair s'inscuntrar – quai cun dumbrar er ils uffants.

Ultra da quai vul il SGV er che l'obligatori da purtar mascrina vegnia precisà. Per deliberar ina persuna da quel obligatori, pretenda l'uniun in attest d'in medi ubain d'in psicolog tar il qual la persuna è propi er en tractament.

Ord l'archiv:

video
Mini-lockdown en Grischun: Ustarias e lieus da temp liber
Or da Telesguard dals 04.12.2020.
laschar ir

RTR novitads 12:00

Artitgels legids il pli savens

Scrollar a sanestra Scrollar a dretga