Siglir tar il cuntegn
cuntegn

Svizra Memia pauc temp per memia bleras chaussas

Famiglia, lavur, hobis, perchasa ed amis – da metter tut sut in tetg daventa adina pli grev per ils Svizzers.

In um cun ina cigaretta en maun che tegn ils mauns avon il chau.
Legenda: Adina dapli Svizzers èn stressads. Keystone

Radund la mesadad dals Svizzers è mintgatant e var 30% d'els èn savens u bunamain adina stressads. Tar las dunnas èn 35% savens u bunamain adina stressadas, tar ils umens è quai sulet mintga quart. Quai mussa in studi da l'institut demoscopic Sotomo. L'institut ha questiunà 8'000 persunas per quest studi.

Mintga segunda persuna dumandada avess gugent dapli temp per far sport u per passentar cun amis. Raschun per il stress sajan fitg savens obligaziuns privatas sco il perchasa, lavurs administrativas ed uniuns. Passa in terz dals dumandads èn però er stressads da la lavur che s'extenda adina dapli era en il temp liber – saja quai pervi da sururas ubain correspundenza electronica e telefonats ordaifer il temp da lavur.

Uffants fan cuntent

Medias classicas ubain socialas vegnian numnadas da radund in tschintgavel sco factur per stress. En il medem mument sa recreeschian dentant er var 45% cun guardar televisiun, serias ubain cun l'internet. Recreaziun chattian dentant las pli bleras persunas – numnadamain pli che la mesadad – cun passentar temp en il liber.

Il studi mussa che stress ha in'influenza negativa sin l'esser cuntent cun l'atgna vita. Tgi che ha da rar ubain mai stress ha quatter giadas pli savens in'auta cuntentientscha da vita che persunas ch'han savens stress da temp. In'excepziun èn però geniturs. Quels sajan bain pli savens stressads che persunas creschidas senza uffants, dentant era marcantamain pli cuntents cun lur situaziun da vita. Mintga tschintgavel dals dumandads inditgeschia da savair sa recrear cun passentar temp cun ils uffants.

RR novitads 11:00