Siglir tar il cuntegn

Header

cuntegn

Svizra Memia pauc plazs en nov bajetg da l'administraziun federala

La Confederaziun planiseschia memia paucas plazzas da lavur en ses nov cumplex d'administraziun a Berna. Quai scriva la controlla da finanzas.

A partir dal 2019 duain 2'300 persunas lavurar en ils trais cumplex da la Confederaziun. Questa utilisaziun saja memia bassa e betg da responsar ord vista economica. I dovria plaz per 900 plazzas dapli. En il nov cumplex duain lavurar en l'avegnir tranter auter emploiads da l'Uffizi federal per polizia (fedpol) e la Procura publica federala.

Previs sajan suenter l'emprima etappa da bajegiar, maximalmain 3'200 plazzas da lavur, scriva la controlla da finanzas. Planisadas sajan dentant dad occupar be 2'300 plazzas, inclusiva reservas. Quai na saja betg giustificabel. Il parlament spetgia ch'ils bajetgs vegnian occupads a moda economica. La controlla da finanzas propona da far midar dapli plazzas administrativas en ils novs bajetgs, e quai il pli tard suenter la segunda etappa da bajegiar. Quai na saja dentant betg stà part da la controlla.

Nizzegiar capacitads

L'Uffizi federal per edifizis e logistica (UFEL) ch'è responsabel, stoppia procurar che las capacitads dals bajetgs vegnian era nizzegiadas cumplainamain, argumentescha la controlla da finanzas. Mo uschia possia dar sinergias, che sajan vegnidas empermessas al parlament cu quel ha lubì il credit.

La controlla da finanzas constatescha dentant era che l'UFEL n'haja betg las cumpetenzas necessarias per realisar la planisaziun. Per occupar las plazzas a moda adequata sajan ils departaments responsabels.

RR novitads 11:00

Artitgels legids il pli savens