Siglir tar il cuntegn
cuntegn

Svizra Memia pauc persunal per sa defender d'attatgas da cyber

Il Departament federal da defensiun ha memia pauc persunal per sa defender cunter attatgas da cyber. Actualmain hajan els 50 talas plazzas. En var dus onns duain quai esser 100 dapli. Quai ha il minister da defensiun Guy Parmelin ditg en ina intervista cun las gasettas «Tages-Anzeiger» e «Der Bund».

Clav da segirtad cunter cyber.
Legenda: Guy Parmelin tschertga urgentamain 100 novs informatichers per far frunt ad attatgas da cyber. Keystone

Il minister da defensiun Guy Parmelin ha ditg, ch'els hajan actualmain 50 plazzas. Fin il 2020 vul il Departament federal da defensiun stgaffir 100 plazzas dapli. Plinavant veglia l'armada en lur strategia da guerra cun meds electronics scolar mintg'onn 50 spezialists. El medem mument vegn era profundà la cooperaziun cun las scolas autas. Sche quai reusseschia, lura duessi era esser pussaivel da cuntanscher la mira.

Problems da chattar bun persunal

Fastidis fa al departament da defensiun dentant la concurrenza per bun persunal. L'armada, l'administraziun ed era interpresas privatas sco Google – tuts tschertgian ils medems spezialists d'informatica, ha Parmelin ditg.

Preparà meglier sin attatgas da cyber

Avant dus onns, cura che Parmelin ha surpiglià il Departament federal da defensiun DDPS saja quel stà preparà mal sin attatgas da cyber. Il DDPS saja dentant betg stà il sulet departament cun quest problem. Entant haja quai sa midà. Il departament saja uss preparà megliers sin talas attatgas perquai ch'ins haja instradà ils pass necessaris.

RR novitads 11:00