Siglir tar il cuntegn

Svizra Meglras prestaziuns per giuvenils cun impediments

L’assicuranza d’invaliditad (AI) duai gidar meglier giuvenils cun impediments da chattar in’emprima plazza da lavur. Er uffants e persunas cun malsognas psichicas duajan survegnir agid supplementar. Uschia vul il Cussegl federal optimar l'assicuranza d'invaliditad.

Ina persuna che lavura en ina cuschina.
Legenda: Il Cussegl federal vul er evitar che persunas cun in impediment psichic perdan lur plazza da lavur. Keystone

Il pass davent da la scola en la vita da lavur saja per giuvenils cun impediments in grond problem, scriva il Departament federal da l’intern. La cassa d’invaliditad n’haja actualmain nagina pussaivladad da sustegnair questa midada.

Per meglierar la situaziun dals giuvenils dovria quai ina registraziun tempriva e mesiras d’integraziun socialas en il process da lavur. Plinavant prevesa il sboz in model da renta senza stgalims. La fatschenta è uss enfin ils 18 da mars 2016 en consultaziun parlamentara.

Agile.ch, Integration Handicap e Travail.Suisse beneventan intent dal Cussegl federal

Pliras organisaziuns beneventan, ch’il Cussegl federal vul promover l’integraziun da persunas cun impediments psichics en il process da lavur. Uschia er las organisaziuns per persunas cun impediments Agile.ch e Integration Handicap sco er l’uniun tetgala dals lavurers Travail.Suisse. Dentant pretendan Agile.ch e Travail.Suisse che las interpresas vegnian obligadas da prender talas mesiras.

Emploiaders pretendan dapli mesiras da spargn

Critica datti areguard il sistem da rentas sco er che las interpresas na vegnian betg obligadas da prender talas mesiras. La federaziun dals patruns refusa mesiras liantas per las interpresas e pronunzia, che las mesiras da spargn manchian tar la refurma da la cassa d’invaliditad.

La refurma da la cassa d'invaliditad fetschia mintg’onn in deficit da 600 milliuns francs. Ord quai motiv pretenda la federaziun dals patruns da spargnar tar las rentas d’uffants respectivamain tar rentas da retschaviders da l’AI cun uffants.

RR novitads 12:00 / 14:00