Siglir tar il cuntegn

Header

Navigaziun

Collavuratura d'in apoteca stat avant ina cruna plaina cun stgatlas da medicaments.
Legenda: Ils preparats originals custan en Svizra tant sco en l'exteriur. Generica resta dentant per bunamain 50 % pli chara. Keystone
cuntegn

Svizra Medicaments generics dubel uschè chars

Medicaments generics, pia copias da medicaments originals, custan en Svizra bunamain dubel uschè bler sco en l'exteriur. Quai mussa in studi da santéuisse, Interpharma e l'uniun svizra da firmas da farmazia vips.

"Pussaivladads d'optimar il pretsch"

I dettia in tschert spazi per adattar ils pretschs per medicaments generics. Quai conceda Thomas Cueni, secretari general dad Interpharma, l'uniun svizra da firmas da farmazia. El conceda ch'ina differenza da pretsch da 47% saja grev da declerar.
Ils medicaments originals èn tenor il studi pli u main tuttina chars en Svizra sco en l'exteriur. Il studi sa basa dentant sin il november 2014 cun in curs da l'euro dad 1.29. Cun la decisiun da la Banca naziunala svizra d'abolir il curs minimal èn medicaments originals daventads 15% pli chars.

Sbassar immediat ils pretschs

Pretensiuns cleras fa Verena Nold da SanteSuisse: Ils pretschs per medicaments stoppian vegnir adattads al curs actual da l'euro. Uschia pudess ins spargnar mintg'onn 400 milliuns francs. Ed ils pretschs duain vegnir adattads mintg'onn per tut ils medicaments. Actualmain fixescha la confederaziun en in cumpromiss cun la branscha da farmazia ils pretschs per ils medicaments. Ella fa quai mintg'onn per in terz dals medicaments e sa basa sin in curs da l'euro en media.

Il studi da SanteSuisse, Interpharma e l'uniun svizra da firmas da farmazia ha dal reminent cumpareglià ils pretschs da medicaments en Svizra cun quels en Germania, Danemarc, Ollanda, Gronda Britannia, Frantscha e l'Austria e quai il november 2014.

RR novitads 12:00