Dal report da pajais 2017 da l'interpresa Intrum Justitia resorta che geniturs spendan dapli per ils uffants che quai ch'i vulan u han. Prest 28% han inditgà d'avair cumprà insatge per ils uffants perquai ch'i sa chattavan sfurzads da la societad – quai schebain ch'i n'avevan betg ils daners per quai. Responsabel per il squitsch social fa ina da trais persunas las medias socialas.
Periclitads èn cunzunt geniturs pli giuvens. 77% dals geniturs en la vegliadetgna tranter 18 e 34 onns ch'han inditgà d'avair sa sentì sfurzads da cumprar insatge, han almain ina giada er fatg quai. Sisum la glista èn stads telefonins, vestgadira da marca e chalzers.
Modas da pajar conservativas
Quai che pertutga las modas da pajar restan ils Svizzers conservativs: 28% ha inditgà ch'i negheschian considerablamain che quints digitals sajan megliers. Quella quota è pli auta che la media europeica cun 17%. Ed era en connex cun pajar cun daners prestads è il pajais da las alps pli conservativ che ses vischins. La maioritad ha inditgà ch'i chattan quai fallà – cunzunt quai che pertutga vacanzas. Il pli ditg spetgan ils consuments cun pajar quints da taglia, medis u assicuranzas.
RR novitads 10:00