Charn cundida vegn suttamess a la medema tariffa da dazi sco charn betg cundida. Cunter la veglia dal Cussegl federal ha il Cussegl dals chantuns approvà questa midada sco gia il Cussegl naziunal.
Fin ussa po charn cundida vegnir importada pli bunmartgà che charn betg cundida. Quai saja ina «rusna da dazi» che stoppia vegnir stuppada, han fatg valair ils adherents da la midada. Il Cussegl federal ha refusà la midada perquai ch'i vegn violà uschia reglas da la WTO. L'exteriur na vegnia betg ad acceptar quai, ha avertì la ministra da finanzas Eveline Widmer-Schlumpf.
