Siglir tar il cuntegn

Svizra Mazzament a Hemmental SH

A Hemmental en il chantun Schaffusa èn vegnids mazzads cun in cuntè la dumengia saira in um da 56 onns e ses schender da 26 onns. La polizia suppona in delict da relaziun. La dunna da l'um da 56 onns e la figlia èn vegnidas arrestadas scriva la polizia. Ellas èn sut suspect dal delict.

sanester in auto da polizia, davostiers polizists che han segirà la via
Legenda: La polizia suppona ch'ils dus umens èn vegnids mazzads pervi d'ina dispita da relaziun. Keystone

Las 23:00 uras la dumengia saira è la polizia vegnida alarmada ch'i dettia ferms sbratgs ord in'abitaziun a Hemmental. Cura che la polizia è arrivada ha ella chattà ils dus umens svizzers mort e cun blessuras da cuntè. Il lieu dal delict è l'abitaziun da l'um da 56 onns e sia dunna.

Sin fundament da la situaziun generala na possi betg vegnir sclaus che la dunna e la figlia sajan responsablas per il mazzament, scriva la polizia. Las investigaziuns e la segirada d'indizis n'èn anc betg terminadas.

RR novitads 8:00