Siglir tar il cuntegn

Header

cuntegn

Svizra Maudet sa perstgisa e vul restar en la politica

Il president da la PLD da Genevra vul ch’il cusseglier guvernativ, Pierre Maudet, sa retiria. Quai ha Alexandre de Senarclens ditg a la radunanza generala extraordinaria da la partida.

Maudet haja tradì tuts cun dir – mais a la lunga – manzegnas, uschia de Senarclens. Plinavant ha el ditg che sche la basa sustegnia Maudet, lura demissiuneschia el.

Era il cusseglier naziunal, Christian Lüscher, ha crititgà ferm Maudet. El ha surtut renfatschà al cusseglier guvernativ d’avair ditg manzegnas a tuts. Sche sia amur per la partida saja sincera, lura stoppia Maudet ussa sa retrair – per l’amur da la partida, uschia Lüscher.

«Sorry»

Maudet da sia vart è sa perstgisà per sias manzegnas e ses cumportament sbaglià. El sez na possia betg sa perdunar. Maudet ha supplitgà la PLD da Genevra da pudair restar en la politica.

Dapli che spetgà

Ils delegads da la PLD da Genevra èn sa reunids per discuter sche la basa da la partida chantunala sustegna anc il cusseglier guvernativ Maudet u betg. A la fin han els decis da sustegnair Pierre Maudet. Quai cun ina differenza da stgars 30 vuschs da las 709 vuschs pussiblas. Var 800 persunas èn stadas preschentas. S'annunzià eran var 500 persunas.

La procura publica investighescha cunter il cusseglier guvernativ da Genevra pervi d'in viadi dispitaivel ad Abu Dhabi la fin dal 2015.

RR novitads 21:00

Artitgels legids il pli savens