Siglir tar il cuntegn
cuntegn

Svizra Martin Schmid na vul betg

Il cusseglier dals chantuns grischun Martin Schmid ha annunzià envers Radiotelevisiun Svizra Rumantscha da betg vulair candidar. Il sez appartegnia a la Svizra latina, ha argumentà Schmid.

Legenda: Tadlar il audio Mezdi: Martin Schmid na vul betg. Durada 02:29 minutas.
02:29 min, Actualitad dals 15.06.2017.

Suenter la Cussegliera dals chantuns songagliaisa Karin Keller-Sutter e ses collega d’uffizi Andrea Caroni da l‘Appenzell Dadora ha era il Cusseglier dals chantuns grischun Martin Schmid annunzià da betg vulair candidar per la successiun dal Cusseglier federal Didier Burkhalter. Sco quai ch’el ha ditg ad RTR saja per el cler che la Svizra latina haja il dretg sin quel sez en la regenza.

Quai cun il carussel da candidats saja uschia ina chaussa, di Martin Schmid. El n’haja perquai era betg fatg gronds patratgs suenter ch'el haja udì da la demissiun da Cusseglier federal Didier Burkhalter. Candidat sajan ins anc spert ina giada, di il Cusseglier dals chantuns grischuns.

Bleras persunas capablas

Mo tgi vesa el sco candidatas ni candidats per la successiun da Burkhalter? Schmid resta diplomatics. I dettia blers candidats capabels ed il carussel vegni era anc a girar. Mo l’emprim vegni el ussa laschar passar la stad enfin che l’Assamblea federala vegn lura il settember ad eleger in successur.

E las candidatas? Na fissi ussa, passa in quart tschientaner suenter la demissiun d'Elisabeth Kopp, l’emprima dunna el Cussegl federal, betg temps che la pld nominas puspè ina giada ina dunna? El na sclaudi quai betg. Il mument saja gie tut anc avert. “La pld duai nominar quellas candidatas e quels candidats ch’èn il meglier adattads per ademplir quella incumbensa e che pon lavurar bain en il gremi dal Cussegl federal. E quai è tenor mai ina chaussa che vegn decidida independent da la schlattaina.”

Impurtant saja che la persuna nominada sappia lavurar en in gremi collegial, haja ina gronda savida generala ed saja flexibels. Era l’abilitad da collavurar cun il Parlament federal saja fitg impurtant cunzunt perquai che era intgins temas pesants sco per exempel il dossier da l’Europa sajan sin maisa.

Meglras schanzas la proxima giada?

Tut qualitads ch'ils collegas el Parlament federal attribueschan era a Martin Schmid. Po pia esser che sia situaziun pudess sa midar sch’i va in di per la successiun da tschai Cusseglier federal dals liberal democrats, Johann Schneider-Ammann. Lez ha annunzia ier da vulair star en uffizi enfin la fin da la legislatura. Pia almain anc dus onns.