Siglir tar il cuntegn

Header

cuntegn

Martgà da lavur Situaziun è strusch sa meglierada

Per persunas che tschertgan lavur èn las vistas a curt termin strusch sa meglieradas il terz quartal da l'onn current. Malgrà ch'ins ha abolì il lockdown resta l'indicatur da l'Institut da perscrutaziun da la conjunctura, KOF tar minus 12,9 puncts cumpareglià cun minus 20,6 puncts il mais avant.

Quest pitschen restabiliment il terz quartal, na tanscha dentant betg tenor il KOF per ina fin d'alarm. L'indicatur saja anc adina fitg bass ed ins quinta che ulteriuras plazzas da lavur vegnian stritgadas. Ils ultims 15 onns saja l'index stà sulettamain trais giadas pli bass.

Differenzas tranter las branschas

Las differenzas tranter las branschas èn tenor il KOF considerablas. En las branschas, ch'han patì fitg sut las mesiras da la Confederaziun, sajan las prognosas suenter la fin dal lockdown sa meglieradas, uschia per exempel tar l'industria da construcziun, il commerzi en detagl u en la branscha dals servetschs.

Dentant er en questas branschas saja anc memia baud per ina fin d'alarm. Ils indicaturs d'occupaziun sajan anc adina negativs. Remartgabel saja quai cunzunt tar ils ulteriurs servetschs.

Restauraziun ha da cumbatter

Malempernaivel è tenor il KOF la situaziun en la restauraziun. Là è l'indicatur cun -40 puncts bunamain tuttina bass sco en il quartal avant. Auter ch'il 2020 n'è l'indicatur anc mai stà pli bass che -30 puncts.

audio
Per tadlar: las novitads da las 12:00
ord RTR Audio dals 03.08.2020. Maletg: RTR
laschar ir. Durada: 4 minutas 48 Secundas.

RTR novitads 12:00

Artitgels legids il pli savens