Siglir tar il cuntegn

Svizra Martgà da latg è anc adina inundà

Ils producents da latg svizzers cumbattan vinavant cun pretschs da latg bass. Tenor l'associaziun dals producents da latg SMP na saja ina midada da tendenza il mument betg en vista.

Brentas da latg.
Legenda: Il mument vegn magasinà passa 6'500 tonnas paintg perquai ch'il martgà è inundà cun latg. Keystone

Ils delegads da l'associaziun han decis a lur radunanza da cuntinuar cun las mesiras per stabilisar il martgà. Quellas hajan salvà ils producents da pretschs anc pli bass. La differenza tranter ils pretschs da latg svizzers e quels da l'UE na saja però anc mai stada uschè gronda, ha ditg il president dals producents da latg Hanspeter Kern.

LactoFama vegn finanziada vinavant

Per stabilisar il pretsch da latg avevan ils producents decis avant dus onns da fundar la firma d’export LactoFama SA. La finamira da quella è d’exportar grass da latg che na vegn betg duvrà en Svizra. Ils delegads han decis da cuntinuar cun la finanziaziun da LactoFama fin la fin da l’onn. La contribuziun munta sco fin qua a 0,35 raps per kilo. Co ch’i duai ir vinavant l’onn che vegn è anc avert.

Passa 6'500 tonnas paintg vegnan magasinadas

Quest onn duai vegnir examinà sche e co ch’ins po intervegnir sin il martgà. Il mument vegn magasinà passa 6'500 tonnas paintg perquai ch'il martgà è inundà cun latg. Perquai che bler memia bler latg è sin il martgà, crescha il squitsch sin ils pretschs.

RR novitads 17:00