Bain èn adina dapli abitaziuns en Svizra vidas. Suenter in creschament da duas cifras l'onn passà è il dumber d'abitaziuns vidas ils davos mais creschì moderà. Quai mussan las cifras da l’Uffizi federal da statistica.
Totalmain eran il 1. da zercladur 2019 en Svizra 75'323 abitaziuns vidas. Quai èn 1,66% da tuttas abitaziuns, inclus chasas d'ina famiglia. Cumpareglià cun l'onn avant eran 3'029 abitaziuns dapli betg occupadas, quai è in augment da 4,2%.
Trend vers engiu cuntinuescha
L’uffizi discurra d'in trend che saja d’observar dapi ils ultims 10 onns. La dinamica sin il martgà d'abitaziuns è dentant sa calmada. En la medema perioda da l'onn passà aveva l'augment d'abitaziuns vidas muntà a 13%, la quota d'abitaziuns vidas era tar 1,62%.
Grond augment en il Tessin
Il pli grond augment d’abitaziuns vidas hajan nudà il Tessin e la Svizra Bassa. Las pli bleras abitaziuns vidas ha, sco gia l'onn avant, il chantun Soloturn. Sco sulet chantun ha il Soloturn surpassà la martga da 3%. Bleras abitaziuns vidas datti era en ils chantuns Turgovia (2,65%), Giura (2,59%) ed Argovia (2,59%).
Sut la martga dad 1% restan ils chantuns Zug (0,42%), Genevra 0,54%), Sursilvania (0,87%) e Turitg (0,89%).
RR novitads 10:00
