Maridaglia da dus furniturs da construcziun

La gruppa AFG Arbonia Forster vul surpigliar l'interpresa industriala Looser a l'interpresa nova Arbonia SA. Dals anteriurs acziunaris da famiglia cumpra AFG la cumpart da maioritad da 53%. Per il rest fa l'interpresa in offerta publica da cumpra u da barat.

vista sin la sedia da l'interpresa AFG Arbonia

Legenda da maletgs: La sedia da la gruppa AFG Arbonia Forster. Keystone

purtret da la Looser Holding

Legenda da maletgs: La Looser Holding «marida» cun la AFG Arbonia Forster. Keystone

Per in'aczia da Looser vegn purschì 5,5 aczias al num da l'AFG e vitiers anc 23 fr. en daners bluts. En total vul la gruppa AFG dar ora il maximum 87,4 milliuns francs per la cumpra. Cun quest'offerta survegn Looser ina valita da 511 milliuns francs. AFG planisescha da retrair las aczias da Looser da la bursa.

Entras la fusiun tutga la gruppa en l'Europa centrala tar las grondas firmas en las spartas fanestras e portas sco er en la sparta transport da chalur sin basa d'aua en la tecnica da bajetgs. Cun sias portas spezialas ha AFG empruvà gia daditg da reducir la dependenza dal martgà svizzer. Cun la cumpra da Looser po AFG profitar da la ferma posiziun da Looser en la Germania e la Pologna. Vitiers tutga la gruppa uschia tar ils leaders en Svizra pertutgant infrastructuras mobias, uschia communitgescha AFG.

La gruppa quinta cun ina svieuta cumbinada da radund 1,4 milliardas francs ed in gudogn d'almain 150 milliuns francs l'onn 2018.

RR novitads 08:00