Siglir tar il cuntegn

Svizra Mariano Tschuor surpiglia il timun tar Focal

Mariano Tschuor è il nov president da la fundaziun Focal.

Mariano Tschuor.
Legenda: En il sectur da film ed audiovisiun e l'um da 59 onns da chasa. Keystone

Suenter ses post da direcziun tar la SSR SRG surpiglia Mariano Tschuor uss il timun tar la fundaziun Focal. Sco la fundaziun communitgescha, saja el vegnì elegì da la radunanza generala dals 16 d'avrigl.

Fundaziun Focal

La fundaziun Focal è ina fundaziun per perfecziunament Film ed Audiovisiun. Ella porscha a persunas dal film ed audiovisiun ina plattafurma da furmaziun effizienta.

Mariano Tschuor vegn ad entschaiver ses uffizi il prim da schaner da l'auter onn ed uschia rimplazzar Thomas Geiser che chala suenter esser stà 16 onns president.

Nagin nov sectur per Tschuor

En sia carriera è l'um da 59 onns stà dramaturg al teater, moderatur, redactur, manader da projects e dal program per radio e televisiun, directur dad RTR e la finala commember da la direcziun da la SSR SRG. Questa scena è damai in champ, nua che Tschuor è da chasa.

RR novitads 09:00