Siglir tar il cuntegn
Inhalt

Svizra Marc Mächler elegì en regenza songagliaisa

Il deputà da Zuzwil e president da la PLD songagliaisa Marc Mächler è nov cusseglier guvernativ dal chantun da Son Gagl. Ad el èsi reussì da sa distanziar da Esther Friedli da la PPS. Uschia è la regenza songagliaisa uss cumpletta.

Marc Mächler ha dumagnà il sigl en la regenza songagliaisa.
Legenda: Marc Mächler ha dumagnà il sigl en la regenza songagliaisa. Keystone

Suenter in cumbat electoral plain tensiun ha Marc Mächler (45) da Zuzwil pudì segirar il setavel sez en la regenza dal chantun Son Gagl. La fin da favrer aveva el disditg en l’emprim scrutini per pauc, lura avevan mancà ad el radund 3’500 vuschs.

Nagina schanza per Ammann e Graf

En il segund scrutini ha Mächler uss cuntanschì 45'475 vuschs. Sia concurrenta da la PPS, Ester Friedli, è vegnida sin 39'773 vuschs. Mächler succeda a Willi Haag (PLD) che sa retira da la regenza.

Nagina schanza han gì Richard Ammann da la PBD (9'196 vuschs) ed Andreas Graf ch'è senza partida (9'138 vuschs).

Mächler è dapi 15 onns deputà dal Son Gagl, da professiun è el commember da la direcziun da l’UBS. Sco deputà chantunal ha el fatg num sco politicher da finanzas, quai sur ils cunfins da la partida ora.

RR novitads 14:00