Siglir tar il cuntegn

Header

cuntegn

Svizra Mani Matter festivass oz ses 80avel

Hans Peter Matter, meglier enconuschent sco Mani Matter, è ina legenda musicala en Svizra. El è enconuschent per sias chanzuns absurdas e filosoficas, garnidas cun ina presa umor. Il chantautur fiss oz 80.

Mani Matter vegniva titulà ils onns 70 sco in dals impurtants chantadurs da la cultura da Berna. Il sulet ch’el duvrava per intgantà era sia ghitarra.

Oz, 44 onns suenter sia mort, pon ins dir ch’il chantautur bernais è stà in musicist sco nagin auter en Svizra. El è stà l’ambassadur svizzer dal stil chanson, il stil musical nua ch’ins metta gronda paisa sin ils texts.

«i han es zündhölzli azündt»

Renumadas èn cunzunt sias chanzuns legraivlas ed umoristicas sco «der Eskimo» ni «i han es zündhölzli azündt». Matter n’era dentant betg mo in chantadur da buna luna, mabain era in filosof ch'era avert per l’entir mund. El ha cuntanschì cun ses texts tuttas classas da la populaziun, dal pli simpel burgais enfin tar ils pli intellectuals.

Musica da Mani Matter viva anc oz

Mani Matter è mort l’onn 1972 tras in accident cun auto en la vegliadetgna da 36 onns. Sia musica e ses texts portan anc oz fritg e vivan en la musica nova Svizra. Blers artists sco Lo&Leduc ni Greis han fatg covers da sias chanzuns. D'udir èn quellas novas versiuns sin l’album «und so blybt no sys lied» che cumpara ils 2 da settember 2016.

RR actualtitad 08:00

Artitgels legids il pli savens