Siglir tar il cuntegn
cuntegn

Svizra Mamma e bab, mami und papi u il prenum?

Per ils geniturs datti numerus differents nums. Intgins uffants adresseschan lur bab e mamma dentant er simplamain cun il prenum. Datti ord vista psicologica insumma ina differenza, co ils uffants adresseschan lur geniturs?

famiglia cun in affon davos meisa
Legenda: Oravant tut uffants pigns pon avair fasas ch'i dian il prenum empè da bab e mamma. Keystone

«Ord vista psicologica n'èsì - sco er tar autras chaussas en la vita - betg uschè impurtant co ins numna insatgi, mabain co ins viva quai», di Madlaina Semadeni, psicologa da la psichiatria d'uffants giuvenils dal chantun Grischun. Sch'i saja impurtant en ina famiglia da viver ensemen ina vita plain respect ed amur, lura na fetschia quai nagina differenza sch'ils uffants dian «bab» e «mamma» ubain il prenum.

I possia esser ch'ils uffants hajan fasas, en las qualas els dian il prenum. Quai saja oravant tut il cass tar uffants pli pitschens. Damai ch'ils uffants audian co ils geniturs adresseschian in l'auter cun il prenum, surprendian els er quai. Mintgatant decidia l'uffant lura simplamain da restar tar il prenum, uschia Semadeni.