Siglir tar il cuntegn

Header

cuntegn

Malsogna privlusa Difteria en il center federal d’asil a Berna

A Berna han ins constatà che sis persunas en il center federal d'asil han difteria. Quai ha communitgà il Secretariat da stadi per la migraziun. Quellas persunas sajan uss en isolaziun.

Per ulteriurs circa 180 requirents e requirentas d'asil vala ina quarantina. Tar duas persunas hajan ins confermà la difteria en la gula ed er il rapport dals toxins saja positiv. Tar las ulteriuras quatter persunas hajan ins bain er constatà la difteria en la gula, dentant n'hajan ins anc betg il resultat dal test dal toxin. Sintoms da la respiraziun n'hajan nagins dals pertutgads.

audio
Samuel Wyss: «Impurtant da dir è che nagins pertutgads han fin uss sintoms respiratorics»
ord RTR Audio dals 03.08.2022.
laschar ir. Durada: 17 Secundas.

Las sis persunas sa chattan actualmain en isolaziun. Ils ulteriurs 92 giuvenils ed 83 creschids sajan sin duas auzadas en quarantina. Quels pon pia avair contact in cun l'auter. En l'entir bajetg vala in obligatori da mascrinas.

La difteria è ina malsogna infectusa, chaschunada tras ina bacteria. Ella vegn dada vinavant entras guts. La malsogna po donnegiar a moda duraivla organs impurtants, e po esser mortala. La difteria è ina malsogna derasada, dentant era la malsogna per la pli gronda part svanida or dals stadis industrials, grazia a la vaccinaziun generala. Il davos cas da difteria en Svizra saja stà l’onn 1983, ha communitgà l’Uffizi federal da sanadad.

RTR novitads 20:00

Artitgels legids il pli savens