Ils uffizis federals e chantunals per la sanadad dad animals observan per il mument la situaziun, alarmads n'èn els dentant betg. Quai ha confermà Giochen Bearth, il vice-veterinari chantunal dal Grischun. I dettia numnadamain divers motivs per restar calms per il mument. Per l'ina n'importeschia la Svizra quasi nagins animals dals pajais pertutgads, per l'autra è la malsogna anc dalunsch davent dals cunfins svizzers.
Ina influenza ha dentant l'aura actuala. La malsogna vegn dada enavant da mustgins e quels han gugent sch'i è chaud e sitg e san surviver era en regiuns pli autas.
Auter serotip
Suenter che la malsogna era vegnida en Svizra l'onn 2007 aveva la Confederaziun decidì in obligatori da vaccinar per ils onns 2008, 2009 e 2010. Dapi il 2012 vala la Svizra sco libra da la malsogna.
Quellas nursas, vatgas e chauras ch'eran vegnidas vaccinadas avant 5-7 onns na fissan dentant betg immunas cunter la malsogna ch'è activa per il mument sin il Balcan ed en l'Italia dal Sid, di Giochen Bearth. I sa tracta dals serotips 1 e 4. Activ en Svizra era il serotip 8.