Siglir tar il cuntegn
Inhalt

Svizra Malgrà glista naira reclama sin Breitbart.com

Logos da firmas svizras cumparan adina puspè sin la plattafurma dispitaivla da novitads da l’extrema dretga Breitbart. Quai demussan retschertgas da Radio SRF. Pertge resta misterius.

Telefonin cun logo Breitbart.
Legenda: Breitbart, la plattafurma da novitads da l'extrema dretga. RTR

Il pli impurtant en curt

  • La plattafurma d'infurmaziun americana «breitbart.com» chaschuna cun contribuziuns rassisticas e sexisticas adina puspè per indignaziun.
  • Avant in onn hai dà adina dapli reclama da firmas da la Svizra sin Breitbart.
  • Las firmas han immediat sa distanzià da la plattafurma dispitaivla, ed han affirmà da betg pli far reclama sin questa plattafurma.
  • Uss èn puspè cumparids logos da firmas svizras sin breitbart.com. Pertge?

Era sche las firmas han affirmà avant var in onn da betg pli vulair far reclama sin Breitbart, la plattafurma da novitads da l'extrema dretga, cumparan ussa tuttina logos da firmas svizras sin questa plattafurma. La pagina d'internet da Breitbart è sin ina glista naira.

Pertge che lur reclama cumpara sin Breitbart na pon naginas da las firmas declerar. Atgnamain avevan ellas fatg encunter. Coop scriva ch'els laschian actualmain sclerir quai. Ed era Migros sa distanziescha da la reclama sin la plattafurma da Breitbart.

Algoritmus na po betg vegnir suandà

Il problem èn algoritmus, pia proceduras tecnicas sin las qualas las firmas n'han nagina influenza. Uschia sa tschenta reclama magari sin paginas d'internet, che l'inserent na vuleva insumma betg cofinanziar.

RR novitads 06:00

Breitbart.com

è ina plattafurma da novitads e d’opiniuns en ils Stadis Unids. Ella è vegnida fundada dal publicist Andrew Breitbart. Il blogger ed activist Breitbart è naschì il 1969 e mort il 2012 a Los Angeles. Politicamain sa posiziunescha la plattafurma tranter la dretga populistica e l'extrem dretga.