Fermamain pluvì hai surtut en la Planira da Magadino. Enfin la dumengia a bun'ura hai pluvì en la planira 243 mm per meter quadrat. Quai correspunda ad 1,3 giadas tant sco quai che croda en media durant l'avust en la regiun. A Locarno hai dà fin dumengia a bun'ura 254 mm, a Biasca 214 ed a Piotta en la Leventina hai dà 160 mm per meter quadrat. La pli blera plievgia, numnadamain 280mm, è vegnida mesirada a Cevio.
La ferma plievgia lascha dapi il venderdi crescher ils livels dad auals, flums e lais en il Tessin. Plirs auals e flums èn local ids sur las rivas. Er il livel dal lai da Lugano è creschì fermamain, dentant senza surpassar in livel critic.
La ferma plievgia ha er chaschunà impediments, bovas da glitta ed inundaziuns en il chantun Tessin. Inundaziuns hai dà a Gandria al Lai da Lugano, sco er en il nord da Bellinzona. A Bissone è ida giu gia il venderdi ina bova da glitta.
