La notg sin mesemna hai dà ferms urizis en l’entira Svizra. Surtut il Tessin è stà fermamain pertutgà. Per part hai dà enfin 50 liters plievgia per meter quadrat. La lingia da tren tranter Chiasso e Como è pervia da quai stada interrutta la damaun. En il sid dal Tessin èn vegnidas serradas pervia d’auazuns differentas vias sper il Lai da Lugano.
La situaziun en Grischun
Tenor SRF Meteo pudessi dar l'entir di ferma plievgia ed urizis. Quai ch'augmentia il privel per bovas ed inundaziuns. Er regiuns grischunas èn pertutgadas tranter auter la Surselva, la Val dal Rain ed il Mesauc. Sco la polizia chantunala ha confermà envers RTR saja da far quint cun impediments sin via. Per il mument na sajan però naginas vias serradas en il Grischun.
RR novitads 08:00