Ils mortoris pervi da la malsogna da malaria èn sa reducids per 60% dapi l’onn 2000. Quai demussan las ultimas cifras da l’Organisaziun mundiala da la sanadad (WHO). En l’Africa èn ils mortoris pervi da malaria sa reducids per 66% e tar uffants sut 5 onns per 71%. Quai communitgescha la WHO. Per pudair nudar vinavant success en il cumbat cunter la malsogna dovri dentant dapli daners, ha ditg Pedro Alonso, il directur dal program da malaria tar las Naziuns Unidas.
Dapli cas en Svizra
Però èn ils cas da malaria s’augmentads en Svizra marcantamain ils ultims onns. L’onn 2013 haja dà tut en tut 160 cas da malaria. L’onn 2015 haja ins dumbrà 430 cas. Quai ha ditg Daniel Koch da l’Uffizi federal da sanadad publica.
Tenor Koch sa tracti dals novs cas cunzunt dad esters che portian la malsogna en Svizra. Dentant sajan quests cas per gronda part nunprivlus e possian vegnir curads cun success.
Svizra duai gidar a ragischar ora la malsogna
Politichers svizzers han il glindesdi suttascrit a Berna la «Decleraziun da malaria bernaisa». Cun quest pass vulan els rinforzar la rolla da la Svizra en il cumbat cunter la malsogna. Il squitsch sin la politica, l’economia e la societad per il cumbat cunter malaria duai a medem temp vegnir mantegnì.
Rinforzar ils sistems da sanadad
Il cumbat cunter malaria saja er in cumbat cunter la povradad, hai num en la decleraziun. Uschia muntian per exempel 10 pertschient damain malaria in augment da 0,3 pertschient dal product naziunal brut. La finamira è clera: Fin il 2020 duain ils cas da malaria vegnir reducids per 40 pertschient, fin il 2030 per 90 pertschient.
In med per cuntanscher questa finamira è tenor il palpiri il svilup d’instruments innovativs, effectivs e bunmartgads cunter la malsogna. Impurtant èsi tenor la Swiss Malaria Group (SMG) – che ha elavurà la decleraziun – da rinforzar ils sistems da sanadad en ils pajais pertutgads.
RR novitads 09:00 / 11:00