Siglir tar il cuntegn
cuntegn

Svizra Maioritad schess NA a las votaziuns federalas

Schebain l'iniziativa «per il daner cumplain», sco er la lescha davart gieus cun daners vegnissan da la maioritad per il mument refusadas. Quai demussà ina retschertga actuala da la Tamedia.

Urna.
Legenda: Decidì definitivamain vegn ils 10 da zercladur. Keystone
  • 53% schessan Na a la nova lescha davart gieus da daners.
  • L'argument principal è ch'ins intervegn en la libertad economica e d'infurmaziun.
  • Tar l'iniziativa «per il daners cumplain» èn 13% anc betg sa decidids, 45% schess Na.
  • L'argument principal è ch'ins na vul tegnair il sistem stabil.

Sch'il termin da votaziun fiss scadì la fin d'avrigl, lura avess la lescha davart gieus da daners tar 53% dals dumandads survegnì nagin sustegn. Els han respundì ch'els schessan Na u plitost Na a la nova lescha. 42% approvan la nova lescha e 5% n'èn betg anc decidids.

Tge vul la nova lescha?

Cun la nova lescha èn casinos online da l'exteriur bloccads en Svizra.

Il pli grond sustegn chatta la lescha tar simpatisants da la Partida cristiandemocratica e la Partida socialademocratica. Il pli ferm encunter èn aderents da la Partida burgais-democratica.

Las tenutas sa differenzieschan dentant betg mo tenor ideologia, mabain er tenor vegliadetgna: Ils giuvens èn cleramain cunter la lescha, entant che la lescha entrass en vigur, sch'ins dumandass mo ils pensiunads.

Intervenziun e daners per l'utilitad publica

Per ils adversaris è la lescha cunzunt ina «intervenziun en la libertad d'economia e d'infurmaziun», entant ch'il argument principal dals aderents è che la lescha segirescha ch'ils purschiders da tals gieus da daners stoppian dar giu daners per scopos da l'utilitad publica.

Bleras malsegirtad tar l'iniziativa «per il daner cumplain»

Pli pauc clera para l'opiniun tar l'iniziativa «per il daner cumplain». 13% na san anc betg, tge ch'els vulan votar ils 10 da zercladur. Er quella vegniss per il mument però refusada cun 45% tar 42%.

Tge vul l'iniziativa?

Per il mument ha la SNB il monopol tar la distribuziun da bancnotas. Ils daners che vegnan stgaffids da la SNB èn però mo in 10avel dals daners ch'è en circulaziun. 90% dals daners vegnan stgaffids da las bancas. Quai per exempel entras dar credits.

Cun l'iniziativa vulan ins dentant metter ina fin a la creaziun da daners tras las bancas. Mo la SNB duai pli savair stgaffir daners.

Il pli pauc populara è l'iniziativa tar simpatisants da la Partida liberaldemocratica, da la Partida cristiandemocratica e tar la Partida burgais-democratica. Auter èsi tar la sanestra: 48% dals aderents da la Partida socialdemocratica e 66% dals Verds schessan Gea.

E l'iniziativa parta la Svizra er en il «Röstigraben»: Quels da la regiun tudestga èn pli critics envers l'iniziativa ch'ils votants en las regiuns linguisticas franzosas e talianas.

Ina dumonda da la ristga

L'iniziativa «per il daner cumplain» para cunzunt d'esser ina dumonda da la ristga. Uschia vul la maioritad dals adversaris tegnair ferm vid il sistem actual che funcziuna.

Simpatisants argumenteschan dentant cun quai, che quests daners virtuals sajan malsegirs en cas da crisas.

Retschertga Tamedia

Ils resultats da la retschertga da la tTamedia sa basan sin las respostas da 7'255 participants che sa differenzieschan en lur simpatia politica, vegliadetgna e lieu geografic.

RR novitads 09:00