Siglir tar il cuntegn
cuntegn

Svizra Magistraglia svizra pretenda pajas gistas

L'uniun tetgala dals magisters LCH pretenda pajas vardaivlas e gistas per il persunal d'instrucziun. Las pajas da las magistras svizras e dals magisters svizzers sajan anc adina cleramain sut las pajas d'autras branschas cun sumegliantas pretensiuns.

Situaziun en scola.
Legenda: Las pajas da la magistraglia duain vegnir pli vardaivlas e gistas. Keystone

Tenor in'enquista che LCH ha fatg tar sias secziuns chantunalas èn las pajas da las magistras svizras e dals magisters svizzers anc adina cleramain sut las pajas d'autras branschas cun sumegliantas pretensiuns.

Precara saja la situaziun en spezial tar las pajas da mussadras da scolina e tar ils magisters primars. L'uniun da la magistraglia pretenda da chantuns e vischnancas da conceder ils augments da stgalim da paja.

Situaziun dal 2013 fin il 2018

L'onn 2013 hai l'uniun da la magistraglia pretendì dals chantuns d'egualisar e d'eliminar quests deficits fin la fin da l'onn 2018. Dapli lura han els adina puspè fatg quest appel. In onn avant che quest termin fixà scroda, sa mussia che la situaziun da paja saja restada manglusa.

Charta da la Svizra.
Legenda: Datas tenor in'enquista da la LCH. MAD

Mussadras da scolina e magisters primars

Il pli grond basegn d'adattar las pajas saja tar las mussadras da scolina e tar ils magisters primars. En ils chantuns Turitg, Argovia e Schaffusa è vegnì fatg plant. Ed en ils chantuns Argovia e Schaffusa han las accusadras survegnì dretg. En il chantun Grischun, nua che las mussadras da scolina gudognan il pli pauc en l'entira Svizra, vegn preparà in plant.

Pretensiun dal LCH

  • Pajas gistas tenor pretensiun
  • Fidaivla perspectiva da paja
  • Mantegniment da la capacitad da cumpra

RR novitads 09:00