Siglir tar il cuntegn

Header

Navigaziun

Vagun cupitgà.
Legenda: Il vagun cupitgà. Keystone
cuntegn

Svizra Lucerna: Trens crodan or fin glindesdi

A la staziun centrala da Lucerna è mesemna in tren ì sur ils binaris or ed in vagun è cupitgà. Pervi da l'accident resta la staziun centrala da Lucerna serrada fin glindesdi. Quai ha communitgà l'SBB.

L'impurtant en curt:

  • Il traffic da tren resta probabel interrut fin glindesdi a bun'ura.
  • Las colliaziuns alternativas funcziuneschan stabil.
  • A la staziun centrala da Lucerna è la mesemna in tren ì sur ils binaris ora. In vagun è cupitgà sin la vart.
  • 6 persunas èn vegnidas blessadas levamain. Tuttas han pudì bandunar l'ospital la gievgia.

Sco quai che las Viafiers federalas svizras han communitgà gievgia, restia la staziun centrala da Lucerna serrada pli ditg che spetgà, numnadamain enfin l'auter glindesdi, ils 27 da mars 2017.

Donns pli gronds

Ils donns vi dals indrizs sajan pli gronds che supponì fin uss. Quai ha ditg in pledader da la SBB. Quai saja sa mussà suenter allontanar il tren disgrazià. Per transportar ils viagiaturs da e vers Lucerna curseschan numerus bus tranter la staziun da Lucerna e differentas staziuns en il conturn da la citad. Puspè en funcziun è la Zentralbahn cun colliaziuns vers Engelberg u Interlaken.

Tuttina nagin caos

Ma er sche la staziun centrala da Lucerna è bloccada, n'hai dà nagin caos per ils pendularis gievgia a bun’ura. Las colliaziuns alternativas funcziuneschian stabil, ha ditg il pledader da las Viafiers federalas svizras.

Sviament da tren

Mesemna suentermezdi, curt avant l'ina, è in tren ì sur ils binaris or a la staziun da Lucerna. Il quart vagun da la cumposiziun da tren è cupitgà sin la vart ed ha uschia donnegià parts da l'implant da la viafier.

Sco quai ch'il pledader da l'SBB ha ditg sa tractia d'in Eurocity da Milano-Basilea. 160 passagiers sajan stads en il tren. Sis persunas èn vegnidas blessadas levamain. Ellas han entant pudì bandunar l'ospital.

Davart la raschun da l'accident na datti actualmain anc naginas indicaziuns uffizialas. Las autoritads investigheschan en chaussa.

RR novitads 16:00++