Il fieu bacterial è la pli nauscha malsogna da mailers e pairers. Il virus na sa lascha betg pli extirpar. Ord quai motiv è vegnì midà il cumbat cunter il fieu bacterial ad in management dal fieu bacterial, uschia scriva il BAFU. Experts da tut il mund èn interessads vid novas vias per cumbatter la bacteria, uschia era Agroscope.
Da mail a mail
Finamira da l'emprova sut cundiziuns realas (Feldversuch) è da guardar, sch'i gartegia da producir ord ina sort mail suttaposta al fieu bacterial, ina sort mail resistenta a la malsogna. E quai senza midar autras caracteristicas da la sort. I va per il gen resistent al fieu bacterial FB_MR5 dal mail selvadi Malus x robusta 5. La gruppa d'experts da l'ETH Turitg ha integrà quest gen a la sort da mail «Gala Galaxy».
L'emprova sut cundiziuns realas vegn fatga a Reckenholz a Turitg e sut la premissa ch'i na dat nagin sgol da pollen.
RR novitads 14:00