Limitas per levgiaments da la taglia federala per interpresas

Il Cussegl federal ha fixà ina limita per levgiaments da taglia per interpresas en vista a la promoziun economica en regiuns cun structuras deblas. Profitar duajan interpresas en 93 centers regiunals en 19 chantuns.

Quai ha il Cussegl federal decis en vista a la revisiun totala da l’ordinaziun sur da la surdada da levgiaments da taglia en vista a la politica regiunala. La revisiun saja uss serrada giu, scriva il Cussegl federal.

Per mintga plazza nova 95’000 francs

Per mintga plazza stgaffida da nov duai esser pussaivel da trair giu da la taglia 95’000 francs. Per mintga plazza ch’è vegnida salvada 47’500 francs. Fin uss valeva ina procentuala maximala.

Ch’il Cussegl federal ha uss fixà ina tala limita è in resultat da las propostas da la evaluaziun scientifica dal Cussegl federal ha ordinà da far il 2013 il departament federal per economia, furmaziun e perscrutaziun.

Las interpresas che profiteschan vegnan publitgadas

Malgrà critica ord dal parlament resta il Cussegl federal tar la proposta da publitgar en futur ils levgiaments da taglia, uschia vegnia l’acceptanza promovida. Er tar las taglias chantunalas duai tar levgiaments da taglia en connex cun la taglia federala vegnir introduci in limita. Uschia duajan impuls sbagliads vegnir evitads.

RR novitads 15:00