Siglir tar il cuntegn
cuntegn

Svizra Libertad da pressa: Svizra è sin plaz 5

La libertad da pressa vegn acceptada bain en Svizra. Perfin meglier che l'onn avant.

Microfons.
Legenda: En general è la situaziun da la pressa vegnida mendra en l'Europa. Keystone

Era la Svizra il 2016 anc sin plaz 7 tar la valitaziun da pajais en connex cun libertad da pressa, ha l'organisaziun nun-guvernamentala «Reporters senza cunfins» plazzà ella quest onn sin plaz 5.

La stabilitad en Svizra saja salidaivla, quai gist er perquai che la situaziun da medias saja en blers pajais europeics vegnida mendra.

Evaluaziun

La glista da rangaziun ha cumpareglià 180 pajais. Basa per ils resultats èn questiunaris davart la lavur schurnalistica e cifras da violenza e chastis d'arrest cunter schurnalists.

Sin plaz tschintg saja la svizra sa rangada per pliras raschuns:

  • Per l'ina saja il squitsch sin medias privatas, cunzunt sin medias da print, vinavant s'augmentà. Quai stettia cunzunt en connex cun il «sviament» da la reclama sin las raits socialas.
  • La situaziun economica plitost difficila, haja er manà a la concentraziun locala da pliras chasas edituras grondas, sco exempel vegn numnà la Tamedia. Quai saja la basa per ina reducziun da plazzas e reduceschia la diversitad.
  • Ed er la fusiun da l'agentura da novitads SDA e da l'agentura da maletgs Keystone reduceschia il dumber da plazzas e mainia ad ina reducziun da la qualitad schurnalistica. I na saja betg anc cler sch'in sustegn finanzial public possia mitigiar las consequenzas negativas da questa restructuraziun.
  • In'auter factur ch'haja gì in'influenza sin la valitaziun da l'organisaziun saja stà la fin dal magazin «L Hebdo» suenter pli che 35 onns.

  • E tiers il cler Na a l'iniziativa «No Billag» haja la debatta enturn la SRG mussà, che sia finanziaziun e sia grondezza vegnia messa en dumonda.

Grondas differenzas en l'Europa

Il meglier statti cun la libertad da pressa en la Norvegia, la Svezia, l'Ollanda e la Finlanda. En general saja la situaziun da la pressa dentant vegnida mendra en l'Europa. Betg uschè cuntenta è «Reporters senza cunfins» cun La Malta, la Tschechia, la Slovachia e la Serbia. I dettia adina dapli opposiziun cunter las medias ed attatgas sin schurnalists. Plinavant possian ins betg rapportar avunda critic. Quai saja cunter ils principis d'ina democrazia.

Il mender saja la situaziun dentant en la Corea dal Nord e l'Eritrea, nua ch'i na dettia nagina rapportaziun independenta.

RR novitads 06:00