Il Cussegl federal cusseglia da refusar l'iniziativa No-Billag che vul stritgar las taxas da radio e televisiun. Quai ha ditg Doris Leuthard a la conferenza da medias da Cussegl federal en connex cun las votaziuns. Quella iniziativa prendia numnadamain en cumpra ch'i vegnia mo producì quai che saja lucrativ, manegia il Cussegl federal. Uschia patissan la diversitad da las medias e las pussaivladads da sa far in'opiniun. Ultra da quai creschiss l'influenza d'investiders privats e da concerns da l'exteriur. Plinavant saja ina buna schelta da medias impurtanta per in pajais pluriling sco la Svizra.
E sco cussegliera federala Doris Leuthard ha ditg cun preschentar la posiziun dal Cussegl federal saja ina purschida multifara da medias impurtanta per in pajais sco la Svizra.
Stretgas finanzialas per la SRG ed emetturs locals
In «gea» manass tar la SRG e tar emetturs locals pertutgadas tar grondas stretgas finanzialas, uschia argumentescha la regenza. Tar la SRG SSR fetschian las taxas ora 75% dal budget. In «gea» manass tar ina massiva reducziun da la purschida dad oz.
Ils 4 da mars 2018 decida il suveran davart l'iniziativa d'abolir las taxas da radio e televisiun.
RR novitads 10:00
