Leuthard sin visita a Kopenhagen

A Kopenhagen è la presidenta da la Confederaziun Doris Leuthard s’inscuntrada il glindesdi cun il schef da regenza dal Danemarc, Lars Lokke Rassmussen. Temas èn stads la midada dal clima e la collavuraziun da la Svizra e dal Danemarc en l'Arctica.

Purtret dals dus che dattan maun in a l'auter.

Legenda da maletgs: Doris Leuthard e Lars Lokke Rassmussen, il schef da stadi dal Danemarc. Keystone

L'Arctica è stada tema damai che la Svizra ha dapi il matg 2017 il status sco observatur en il cussegl arctic. Quel vegn furmà dals otg stadis cunfinants da l'Arctica, il Danemarc, la Finlanda, l'Islanda, il Canada, la Norvegia, la Russia, la Svezia ed ils Stadis Unids. Era represchentants da pievels indigens èn en quest cussegl. La Svizra è il 13avel stadi betg arctic che survegnì il status d'observader.

«  Er en Svizra vesain nus ch'ils glatschers lieuan pli svelt che spetgà. En Grönlanda vesan ins il pli svelt las consequenzas. Jau less udir valitaziuns d'experts tge che quai munta per nus, per il clima en l'Europa e tge che la politica po far.  »

Doris Leuthard
Presidenta da la Confederaziun

Perscrutaders svizzers en Grönlanda

Suenter la visita cun il schef da regenza dal Danemarc, Lars Lokke Rassmussen sgola Leuthard mardi a Grönlanda. Ella vegn accumpagnada dal perscrutader da glatschers, Konrad Steffen, il perscrutader da clima, Thomas Stocker da l'Universitad Berna e dal president dal cussegl da l'ETH, Fritz Schiesser.

La presidenta da la Confederaziun visita la basa meteorologica da la Svizra, Swiss Camp, nua che perscrutaders svizzers rimnan datas dapi ils onns 90. Els rimnan datas da naiv, glatsch e da l'atmosfera. En Grönlanda èn las consequenzas da la midada dal clima da vesair fitg bain gia oz.

RR novitads 06:00