Siglir tar il cuntegn

Header

Navigaziun

Autos che charreschan tras il tunnel existent.
Legenda: Il tunnel dal Gottard existent è vegnì construì il 1980 e sto ussa vegnir sanà. Keystone
cuntegn

Svizra Leuthard: «In 2. tunnel dal Gottard è necessari»

In segund tunnel dal Gottard saja necessari cunquai ch’il tunnel actual stoppia vegnir sanà, quai ha ditg la cussegliera federala Doris Leuthard cun lantschar la campagna per in segund tunnel dal Gottard.

Ils 28 favrer decida il suveran davart quest project. Il Cussegl federal ed il parlament han decis da construir in segund tunnel per garantir la colliaziun tranter nord e sid durant ch’il tunnel dal 1980 vegn sanà. Il nov tunnel duai vegnir construì aifer 7 onns, quai a partir dal 2020.

Evitar collisiuns

Silsuenter duai il tunnel existent vegnir serrà e sanà. A partir dal 2030 duain lura omadus tunnels vegnir averts sin in vial, il segund duai servir sco strivla da panna. Cun dus tunnels pudess vegnir evità collisiuns en l’avegnir, hai num en la communicaziun dal departament federal per il traffic.

Adversaris avevan lantschà il referendum

Ils adversaris dal segund tunnel na crajan però betg ch’i vegnia a restar tar quai. Els teman che las capacitads sin il traject vegnian tuttina augmentadas. Perquai avevan els lantschà il referendum il schaner.

Per la terza giada avant il pievel

Igl è la terza giada ch’il pievel svizzer decida direct u indirect davart la construcziun d’in segund tunnel dal Gottard, suenter il 1994 (iniziativa da las Alps) ed il 2004 (cuntraproposta davart l’iniziativa Avanti).

RR novitads 15:00