Siglir tar il cuntegn

Header

cuntegn

Lètg per tuts La Baselgia refurmada beneventa la lètg per pèrs omosexuals

Suenter ina viva debatta han ils delegads da la Federaziun da las Baselgias evangelicas approvà il mardi a Berna ina tala dumonda.

La Baselgia refurmada beneventa la lètg per pèrs omosexuals sin basa da dretg civil. Quai ha la radunanza da delegads da la federaziun da las Baselgias evangelicas decidì il mardi a Berna – quai cun 45 cunter 10 vuschs tar 4 abstenziuns.

I na giaja dentant betg per introducir ina lètg da baselgia per pèrs da medem sex. Lezza cumpetenza hajan las Baselgias refurmadas chantunalas.

Debatta cuntraversa

Avant la votaziun hai dà ina debatta animada. In delegà da la Svizra Centrala ha pledà da surlaschar la decisiun a las singulas plaivs. Ina minoritad teologica na dastgia betg vegnir discriminada, uschia sia argumentaziun. Auters han avertì da dispitas e vulevan spustar la decisiun.

Ils aderents dentant èn sa referids sin posiziuns da pli baud da la Federaziun da las Baselgias refurmadas, tenor las qualas la persuna na possia tscherner sia orientaziun sexuala. Cun quai hajan els gia ditg gea a la valur eguala, ha accentuà ina delegada da la Svizra dal Nordvest.

Cussegl naziunal decida il mars

Sin basa da dretg civil era la Cumissiun da dretg dal Cussegl naziunal s'exprimida la fin d'avust per la lètg per tuts. Il sboz da la lescha sa basa sin in'iniziativa parlamentara dals verd-liberals. La lètg è ozendi averta en Svizra mo per um e dunna.

Il Cussegl naziunal tracta probabel en la sessiun da primavaira 2020 il project da lescha. Auter che la PPS e la Partida evangelica da la Svizra (PEV) eran durant la consultaziun tut las partidas per introducir la lètg per tuts.

Ord l'archiv:

Che las leschas davart lètg e famiglia na correspundan betg pli a la realitad, mussa er la perscrutaziun dad Yv E. Nay. En sia lavur da doctorat «Feeling Family» vegnan documentadas ed analisadas famiglias da geniturs dal medem sex e lur problems giuridics. Avant in mais ha Yv E. Nay dà in'intervista en ils Cuntrasts.

video
«Las vitas realas na correspundan betg adina a normas e leschas» – In discurs cun Yv E. Nay
Or da Cuntrasts dals 08.10.2019.
laschar ir. Durada: 25 minutas 50 Secundas.

RR novitads 18:00

Artitgels legids il pli savens