La directivas per lubientschas da dimora e domicil per esters da terzs pajais duain vegnir pli severas. Il cussegl dals chantuns ha approvà ina iniziativa dal chantun Son Gagl.
Concret pretenda l'iniziativa d'engrevgiar las directivas da la lescha federala, areguard concessiun, prolungaziun e revocaziun da lubientschas da dimora e da domicil per esters da pajais ordaifer l'UE e l'EFTA. Ella pretenda dapli obligaziuns ed ina megliera realisaziun dal dretg areguard integraziun, agid social, obligaziuns da scola e mesiras penalas.
Il chantun haja illustrà sia pretensiun cun in cas ch'è vegnì enconuschent d'ina famigliabosniaca en il chantun Son Gagl. Quella na saja betg integrada, vivia dapi onns da l'agid social e na coopereschia betg cun las differentas autoritads, di il text da l'iniziativa. Ils geniturs sajan er gia stads pliras giadas avant dretgira.
Da retrair la lubientscha da dimora e domicil a la famiglia n'è sin fundament da la lescha existenta betg pussaivel. Quai na saja era pil Cussegl dal chantun da Son Gagl betg chapibel. Quel saja ì da quai annora ch'ils criteris d'integraziun sajan fixads uschia che cas d'integraziun fallads e refusads vegnian sancziunads cun pigliar davent la lubientscha. Qua stoppia vegnir agì.
RR novitads 17:00