Lescha dal servetsch secret è finida

Il Cussegl naziunal ha approvà las ultimas diferenzas cun il Cussegl dals chantuns davart la nova lescha dal servetsch secret.
Cun la nova lescha dastga il servetsch secret da la confederaziun tedlar giu telefons u stanzas privatas e sa far access a computers.

sanester ina chasa, entamez ina gronda antenna parabola

Legenda da maletgs: L'antenna dal servetsch secret svizzera a Zimmerwald, chantun Berna. Keystone

Questas novaziuns eran gia stadas en discussiun avant 6 onns. Lura aveva la lescha però fatg naufragi pervi da la PPS, la PS ed ils Verds. La PPS ha entant midà maini e declera quai cun la situaziun da smanatscha ch'è sa midada. Il servetsch secret dovria dapli cumpetenzas e meds moderns per impedir attatgas terroristicas. Senza segirtad na dettia nagina libertad.

Attatga da spiun senza suspect

Ils adversaris, oravant tut ils Verds, averteschan d'attatgas da spiun e la surveglianza totala. Persunas suspectadas pon gia oz vegnir survegliadas, uschia lur argument. Survegliar insatgi senza in suspect sin in delict penal na giaja betg. Ils dretgs fundamentals na dastgian betg vegnir restrenschids en favur d'ina segirtad supponida.

L'ultim pled en chapitel dastgass avair il pievel svizzer cunquai ch'ils adversaris smanatschan cun il referendum.

RR novitads 14:00