Siglir tar il cuntegn

Header

Protestas da personal da gasettas.
Legenda: Las gasettas e lur collavuraturas vegnan vi e pli sut squitsch – uschia sco la fin da settember tar «24 heures» e «Tribune de Geneve». Keystone
cuntegn

Svizra Leger, dentant betg pli pajar

En Svizra na paja entant mintga segund consument da medias nagins daners pli per gasettas. Quai resulta dal «Cudesch annual per la qualitad da las medias».

Medemamain mintga segund na legia strusch pli rapports che mettian a lieu la politica naziunala e locala. «Consolant» tenor ils auturs: Tuttina sajan questas persunas conscientas da l'impurtanza ch'il schurnalissem d'infurmaziun ha per la societad e la democrazia.

Trend resta dentant: Blers utilisaders da medias han mo pauc temp per novitads. Uschia er las duas gruppas pli grondas:

Ils «deprivads da news» ed ils «global surfers»

Questa gruppa saja tenor ils auturs dal cudesch creschida ils ultims set onns per 10% sin 31%. Ella saja «extremamain sutprovedida cun news» e realiseschia en emprima lingia catastrofas, crisas e scandals. Da temas politics u da la politica svizra quotidiana n’haja ella betg interess.

Ina medema bilantscha pauc buna han era ils «global surfers», che fan ora 21% dals consuments da medias. Er els na s’interesseschian betg per infurmaziuns regiunalas u naziunalas, malgrà ch’igl sa tractia qua savens da persunas cun buna scolaziun che derivan dad in’autra naziun da center dal vest. Uschia na prendan ellas betg part a la debattas da la societad svizra.

11% «utilisaders intensivs»

Da l’autra vart dal spectrum èn quels utilisaders, che consumeschan pliras gasettas e products online. Questa gruppa vegn dentant tenor ils auturs adina pli pitschna.

Il svilup sco tal mainia ad ina «situaziun da finanziaziun difficila per il schurnalissem d’infurmaziun» concludan ils auturs dal Cudesch annual per la qualitad da las medias.

RR novitads 12:00