El guarda enavos cun in bun sentiment. Il biro en la 5avla auzada en la sedia principala da la Raiffeisen a Son Gagl è dentant anc betg rumì dal tut. Stgatlas, ordinaturs e regurdientschas schain anc enturn. La luna dal CEO da la banca gronda è buna, el fa sgnoccas e prenda peda per respunder las dumondas.
«In tip curaschus e giagliard»
Er en las medias è Pierin Vincenz savens stà present. Sco tip curaschus e giagliard è el vegnì titulà. Igl ha però er dà critica, i na tutiga betg ch'in CEO d'ina banca gronda sa mussia uschè savens en il Blick u en la Schweizer Illustrierte. E tuttina, el è quel ch'ha dumagnà la banca sin plaz 3 da las bancas svizras.
Pensiun na munta betg far nagut
«Cler, in zic losch sun jau schon da quai, ma quai è er d'attribuir a la lavur da tut ils auters.» Vincenz resta pia modest. Uss cloma la pensiun, quai che na munta dentant betg che Pierin Vincenz fa nagut. El vegn a surpigliar differents posts en cussegls d'administraziun. La finamira saja dentant da lavurar pli pauc e da dar golf ed ir cun skis pli savens.