Siglir tar il cuntegn

Header

Navigaziun

Pista da skis senza naiv a Kandersteg fin december 2016.
Legenda: I resta fitg grev per pendicularas da survegnir indemnisaziuns per lavur curta sche la naiv manca sco quà fin december 2016 a Kandersteg. Keystone
cuntegn

Svizra Lavur curta tar pendicularas – i resta be la via parlamentara

Ils chantuns da muntogna vulan schluccar las reglas per pendicularas e gestiuns da sport d'enviern per survegnir indemnisaziuns da lavur curta durant ina schletta stagiun. La Confederaziun na vul dentant savair nagut da quests giavischs, uschia ch'i resta be la via sur il parlament.

Il cusseglier guvernativ Jon Domenic Parolini ha surpiglià il timun da la gruppa d'interess l'onn passa. I ha dà discurs cun il cusseglier federal Johann Schneider-Ammnann e l'empermischun che la Cofederaziun mettia ina giada l'entira situaziun sin palpiri. Entant ha Jon Domenic Parolini survegnì il palpiri, quel è dentant – sco spetgà gia suenter il discurs – negativ.

In ristg da la branscha

La posiziun da la Confederaziun è clera: Sco Oliver Schärli dal Secretariat da stadi per l'economia (SECO) declera, saja la mancanza da giasts ed uschia er da lavur pervi da mal'aura in ristg da la branscha. E qua saja tant la Confederaziun sco er il parlament adina stà da l'avis che quai saja in ristg che las gestiuns stoppian purtar sezzas.

Las pendicularas ubain ustarias pon dentant er avrir da mal'aura.
Autur: Oliver SchärliParsura da la partiziun «Martgà da lavur» dal SECO

Ultra da quai vegni vitiers ch'en autras branschas na possia la glieud betg lavurar sche la dumonda manchia. En cas fitg urgents possian las gestiuns però introducir lavur curta tenor l'uschenumnada regla «lavur curta pervi da mancanza da giasts chaschunada da l'aura».

Resposta na cuntenta betg

Ils chantuns da muntogna na partan dentant insumma betg l'opiniun da la Confederaziun. Savens saja l'existenza da las gestiuns periclitada pervi da las reglas uschè severas cumpareglià cun autras branschas. E quai pericliteschia lura las structuras economicas d'entiras regiuns, uschia Cusseglier guvernativ Jon Domenic Parolini.

Schlettas perspectivas per la via parlamentara

Cunquai che la Confederaziun na vul betg vegnir encunter als chantuns da muntogna na resta ad els nagut auter che la via parlamentara. Ma persvader ils parlamentaris da schluccar las reglas, quai vegnia grev, manegia Oliver Schärli dal SECO. Il 2011 haja il SECO numnadamain empruvà sez da far il medem ed incassà in na unanim en la cumissiun responsabla dal Cussegl dals chantuns.

RR actualitad 12:00