Siglir tar il cuntegn
Inhalt

Svizra Lavar daners empè fugia da taglia

La surveglianza dal martgà da finanzas Finma constatescha ch’ils ristgs per bancas svizras sa spostan. Ina raschun è l’augment da daners ord novs pajais industrials sco la Brasilia u la Malaisia. La Finma numna dus cas concrets, Petrobras e 1MDB.

Ina bancnota dad in dollar, in barschun blau ed ina spungia melna.
Legenda: Il cumbat cunter lavada da daners na dovra betg novas reglas, di la Finma. Las Reglas existentas ston vegnir applitgadas a moda pli consequenta. Pixabay

La Finma ha constatà che l'augment da daners ord ils novs pajais industrials muntià per las bancas in ristg creschent. Quai sa mussia ord dus cas concrets, numnadamain il concern d'ieli brasilian Petrobras ed il fonds statal da la Malaisa 1MDB.

Circulaziuns da pliras milliardas dollars

En omadus cas sajan involvidas bancas svizras, ha ditg il directur da la surveglianza da finanzas Mark Branson. I dettia indizis concrets che las mesiras da las bancas cunter lavar daners sajan stadas insuffizientas. Spezialmain inquietant saja ch'i sa tractia da clers cas da corrupziun, uschia Branson. E quests cas na sajan betg vegls: Fin dacurt sajan ils daners vegnids prendids encunter.

La fin finala na sajan las summas naginas bagatellas, uschia Branson. I giaja per summas enormas en l’autezza da pliras milliardas dollars e singulas transacziuns da tschients milliuns.

Donn a la reputaziun dal sectur bancar svizzer

Branson ha ditg ch’el na veglia betg renfatschar pauschalmain insatge al sectur bancar. Areguard il cas da Petrobras sajan trais quarts da las bancas examinadas sa cumportadas correctamain. Tar in quart na saja quai però betg il cas – ed in quart saja memia bler.

Sco Branson constatescha dettia quai er cas da lavar daners sur bancas en l’exteriur. Tuttina donnegeschian tals cas la reputaziun dal sectur bancar da la Svizra. Per cumbatter la lavada da daners na dovria quai betg reglas pli severas. Las reglas existentas stoppian dentant vegnir applitgadas a moda pli consequenta.

RR novitads 11:00