Siglir tar il cuntegn
Inhalt

Svizra Las restricziuns d'entrar valan

La dretgira suprema ha approvà las restricziuns da la regenza americana d'entrar en ils Stadis Unids cumplettamain. Questa decisiun vala dentant mo ad interim – la dretgira vul s'occupar pli profundamain cun il relasch.

Donald Trump che tegna en l'aria il maun.
Legenda: La dretgira suprema ha decidì: las restricziuns d'entrar en il pajais valan. Keystone

La dretgira suprema ha cun l'approvaziun annullà duas disposiziuns provisoricas dad instanzas pli bassas. Quellas permettevan la bandischada mo limitadamain. La dretgira suprema ha fatg attent a duas proceders che tractan il scumond d'entrar sin plaun federal. Sche ditg ch'i dettia en quels proceders naginas decisiuns duain las restricziuns esser valaivlas.

Bandischar pajais muslims per amur da la segirtad

Las restricziuns valan per persunas da sis pajais per gronda part muslims. Pertutgadas en persunas da l'Iran, da la Libia, da la Siria, dal Jemen, da la Somalia e dal Tschad. E per persunas da la Corea dal Nord e da Venezuela vala perfin in scumond total. Quai è la terza versiun dal scumond d'entrar da Trump. Las autras duas versiuns avevan dretgiras betg approvà. Questas prevesevan dentant restricziuns temporaras e mo per pajais muslims, l'actuala betg.

Argumentà il scumond ha il president american Donald Trump cun motivs da segirtad e la protecziun da terrorissem. Quests pajais adempleschian betg las pretensiuns da controlla da segirtad tar dumondas da visa e barat d'infurmaziuns. Per organisaziuns da dretgs umans è in tal agir dentant discriminaziun da muslims – e quai cuntrafa a la constituziun americana.

RR novitads 06:00