Siglir tar il cuntegn

Header

Navigaziun

Legenda: Guardar il video Puras senza paja. Durada 03:15 minutas.
Or da Nouvo RTR dals 05.06.2019.
cuntegn

Svizra Las puras Svizras pretendan dapli dretgs

La situaziun da las puras en la ritga Svizra na saja betg da cumparegliar cun quella da puras en l'Africa, di la presidenta da las puras svizras. Ina chaussa saja dentant la medema: la segirezza sociala na sa chapeschia betg da sasez e na saja er betg garantida – ni en Svizra ni en l’Africa.

Puras duain survegnir dapli dretgs politics e segirtad sociala. Questas pretaisas duain esser part da la missiva per la politica agrara 2022+. Quai pretendan las puras svizras ensemen cun Swissaid.

70% da las dunnas sin bains purils svizzers n'han nagina paja. Quai è inacceptabel.
Autur: Anne ChallandesPresidenta da l'uniun da puras da la Svizra

I dettia 45'000 dunnas che lavurian en Svizra sin bains purils, di Anne Challandes. La gronda part dad ellas, numnadamain passa 31'000 puras, n'hajan nagina paja sco er nagina segirezza sociala. Anc pli gravanta saja la situaziun da puras en l'exteriur. E quai era sche las dunnas sajan responsablas per 70% per tut l'alimentaziun mundiala. Da sustegnair pli ferm la scolaziun da las dunnas en l'exteriur saja impurtant. Uschia possian quellas far pli bunas fatschentas sin martgads e na vegnian betg cugliunadas. Dentant saja era il dretg sin terren impurtant per segirar l'existenza per exempel da puras en l'Africa.

La mancanza da renconuschientscha per puras sin tut il mund ed era en Svizra saja ina situaziun insupportabla che stoppia vegnir midada. Quai vulan las puras svizras e Swissaid cuntanscher cun far in appel. Ils proxims mais rimnan ellas suttascripziuns che duain vegnir surdadas l'october al Departament federal da l'intern ed al Departament federal d'affars exteriurs.

Puras fan chauma

Cun quellas pretaisas, cun l'appel van Swissaid ed era las puras svizras quest venderdi sin via e fan part a la chauma da dunnas. Resumà pretendan ellas: Medems dretgs per dunnas ed umens era sin bains purils – en Svizra sco er en in auter lieu sin il mund.

RR actualitad 17:00