Ed i succeda era la tscherna dals inimis. Ina tala «simbiosa tut autra che sontga» han fatg la PS e la PLD. I dat en egl, ch’ils 2 presidents da partida na laschan betg passar ina pussaivladad per crititgar las posiziuns l’in da l’auter. Philipp Müller dals liberals di ch’ils socialdemocrats sajan lur «Hausfeind», damai ina sort inimi natiral. Nagin propagheschia posiziuns talmain differentas da la PLD sco la PS, declera Müller la situaziun. Ed il pli simpel èsi da sa posiziunar sur in antagonist. Uschia è quest gieu pre-electoral era vegnì giugà suenter la lantschada da la campagna electorala da la PS.
La campagna da la PS ...
La PS ha preschentà il mardi sias ideas per il futur da la Svizra, e sia campagna electorala cun ils 4 temas principals egualitad da las pajas tranter um e dunna, protecziun cunter la desditga da lavurants pli vegls, construcziun statala d’abitaziuns e la segirada da las rentas. La campagna da placats gioga cun prototips, e carichescha il tip bonz cun mandura e cigara en bucca cun parolas sco «Haha, Jobs für alte Büezer? Typisch SP...».
... e la PLD fa il conter
La PLD ha reagi immediat e proclamà ina conferenza da pressa mo paucas uras suenter quella da la PS. Sut il motto «Liberale statt sozialistische Rezepte» han ils liberals ditg, che las posiziuns da la PS sajan «nunmangiablas» ed «indigeriblas».
In cumbat cun pliras fassettas
I na sa tracta tar quest gieu betg mo da sa posiziunar, ma era d’adressar in auter adversari che la Partida populara cun ses tema adina medem: asil ed immigraziun. Ultra da quai sa tracti d’ina cursa tranter la PLD e la PS, tgi che po esser la partida la segund ferma suenter las elecziuns da l’october. Actualmain èn quai ils socialdemocrats. Ma ils liberals han tenor prognosas bunas schanzas da gudagnar quotas d’electurs e sezs en il parlament federal.
In'elecziun d'orientaziun
Tuts èn dentant perencletg ch’i sa tracta d’ina elecziun d’orientaziun, ina uschenumnada «Richtungswahl». Christian Levrat di, che radund 7 sezs en il parlament vegnan a decider suenter las elecziuns dal resultat da fatschentas impurtantas sco l’avegnir da l’AVS (pajaments pli auts versus vegliadetgna da pensiun pli auta), la midada sin il sectur da l’energia (davent da l’energia nucleara gea u na) ed era davart la constellaziun dal Cussegl federal (segund sez per la PPS gea u na).
Betg mintgin di tuttina bler
Entant che Christian Levrat ha annunzià, che la PS vul reeleger senza sche e ma Eveline Widmer-Schlumpf, na vul Philipp Müller betg s’exprimer avant ils 18 d’october davart questa dumonda.
E fin a là vegn Philipp Müller anc in pèr giadas a vesair cotschen, sch’el auda insatge da la PS. E la PS vegn a rinfatschar anc in pèr giadas a la PLD d’esser la bartgetta da la PPS.