La distanza che Svizras e Svizzers han fatg di per di è sa sminuida durant las ultimas emnas. Schizunt sur ils dis da Pasca n'ha la populaziun betg fatg gronds viadis ed èn sa tegnida vi dals appels dal Cussegl federal.
Questa grafica sa basa sin datas da l'interpresa «Intervista». Per incumbensa da l'ETH Turitg e da l'Uffizi da statistica dal chantun Turitg registrescha l'interpresa numnadamain la mobilitad da la populaziun svizra sin basa da datas da telefonins.
Populaziun dovra pli pauc il traffic public
Il concern da tecnologia Apple publitgescha dapi curt, quant savens ch'i vegn tschertgà rutas sin ils iPhones. Grazia a questas datas èsi pussaivel d'eruir tge meds publics ch'èn vegnids frequentads quant savens. En Svizra èn passa 40% dals smartphones products dad Apple.
La grafica mussa che Svizras e Svizzers han surtut tschertgà pli paucas rutas per il traffic public dapi ils 16 da mars. In motiv po esser che la purschida è vegnia reducida durant il «lockdown».
Traffic aviatic croda ensemen
La branscha aviatica è pertutgada fermamain da la crisa da corona. Quai sa mussa er a la plazza aviatica da Turitg: Il dumber da sgols è sa reducì marcantamain las ultimas emnas.
A partir dals 27 d'avrigl vegnan schluccadas las mesiras pass per pass. Quai ha decis il Cussegl federal.