Siglir tar il cuntegn
cuntegn

Svizra Lantschà cumbat per e cunter refurma da taglia sin interpresas 3

Il cumbat da votaziun tar la refurma da la taglia sin interpresas III è lantschà. Tant ils adversaris da la refurma, la partida socialdemocratica e la partida verda, sco era ils adherents, las partidas burgaisas, han preschentà oz ils arguments.

Ils dus placats ch'èn vegnids preschentads dals comités pro refurma e cunter la refurma.
Legenda: Ils dus placats ch'èn vegnids preschentads dals comités pro refurma e cunter la refurma. Keystone

Tenor ils adversaris che sa cumponan da la PS ed ils Verds è la refurma planisada memia chara. Ils pajataglia svizzers stuessan pajar mintg'onn almain 2,7 milliardas francs pervia da las entradas da taglia che mancassan. La partida socialdemocratica aveva lantschà il referendum.

Bandunan tar in na bleras interpresas la Svizra?

Per las partidas burgaisas èsi cler che tar in na bandunan bleras interpresas la Svizra. Uschia stattan ellas unanim davos la refurma da la taglia sin interpresas III.

Per la Svizra saja quai la clav per l'avegnir uschia il tenor dal comité independent al qual la PLD, la PPS, la PCD ils Verdliberals e la BDP fan part.

Ozendi valan per radund 24’000 interpresas en Svizra privilegis da taglia. Quai n'acceptan l'Uniun europeica e la OECD però betg pli. Uschia haja la Svizra uss en ils agens mauns d’introducir premissas da taglia attractivas.

Il pievel svizzer ha da decider ils 12 da favrer davart la refurma.

RR novitads 12:00 / 17:00