Siglir tar il cuntegn
Inhalt

Svizra Landolt: «I dovra la provocaziun per sefar udir»

Il sujet dal placat cunter l'iniziativa «Per il repatriament effectiv» provochescha. Sin il placat cotschen ves'ins la crusch svizra, agl ur sparpagliada en furma d'ina crusch a crutschs, il simbol dils naziunalsocialists.

Suren san ins leger «Na a la giustia da duas classas!», e sut la crusch stattan trais datas: 1933 - Germania, 1948 - Africa dal Sid, 2016 - Svizra.

Quai placat d'in graficher svizzer-britannic ha il Cusseglier naziunal e president da la PBD mess sapientivamain sin ses conto da Twitter.

Las ultimas emnas hajan ins pudì leger commentaris fitg clers da schurnalists, persunas da la cultura, acturs, auturs ed era da politichers. Il placat saja in ulteriur element che duai dasdar e avertir la glieud ch’i na giaja betg en emprima lingia per la repatriament da esters criminals la quala il parlament haja gia reglà en ina lescha.

Tenor Landolt stgaffissi in gie al l'iniziativa ina giustia da duas classas perquai che Svizzers e esters n’avessan lura betg pli ils medems dretgs. Ina tala societad da duas classa saja era vegnida stgaffida da lezzas uras en Germania e durant la apartheid en l'Africa dil Sid. E quai haja lura manà ad ina midada da las valurs cun consequenzas dramaticas.

Martin Landolt accentuescha ch'el pretendi buc che la PPS saja ina partida da Nazis.

L’orientaziun e la midada da las valurs zuppada èn latent avant maun ed i è bun ed impurtant d’avertir en tge direcziun che quest viadi po manar.
Autur: Martin Landoltpresident PBD

Ella rait sociala ha il post da Landolt procurà per bler reacziuns. Ins duaja cumbatter cun arguments cunter l'iniziativa e betg cun polemica. E talas campagnas sajan in autogol e dettian mo schlantsch als adherents.

Era da la PPS datti commentaris gits. Uschia per exempel da la Cussegliera naziunala Natalie Rickli. Quels che sajan cunter l'iniziativa dastgian sco‘i para far tge ch'els veglian, scriva ella sin Twitter.

Martin Landolt na tema betg la confruntaziun. Cunzunt betg sche la critica vegn da la PPS che haja sezza gia disa cun polemisar.

E sch'ins vegli sa far udir el cumbat da votaziun saja quai ina via effectiva sco quai che las numerusas reacziuns mussian. El sez deploreschi quai. Mo el n’haja betg veglia da perder quella votaziun e da sfunsar cun arguments objectivs e moderats. «Ins sto far tut il pussaivel per mussar a la populaziun che quai è ina votaziun fitg impurtanta!»

Fatg canera ha Martin Landolt senz'auter. Sche l’effect tar las Svizras ed ils Svizzers è il giavischà, vegn la dumengia da votaziun a mussar.