Siglir tar il cuntegn

Svizra «Landis und Gyr» vul ir a la bursa

L'entrada dal producent da dumbraders d'electricitad a la bursa saja planisada per il terz quartal da l'onn.

Purtret dal logo da «Landis und Gyr».
Legenda: Landis und Gyr tutga actualmain al concern da tecnologia giapunais Toshiba. Keystone

Toshiba examinescha il mument tuttas opziuns pussaivlas per vender «Landis und Gyr». La fatschenta sezza vul ir a la bursa. Suenter in'istorgia da 120 onns sa legria l'interpresa gia dal pass en il nov futur. Il schef da Landis und Gyr, Richard Mora n'excluda dentant betg la pussaivladad che la fatschenta possia vegnir vendida anc avant il terz quartal. Durant lez planisescha la fatschenta dad ir a la bursa. I dettia plirs interessents per cumprar Landis und Gyr.

Tenor Landis und Gyr vegn dentant preferì la varianta dad ir a la bursa. Decider decidia dentant la finala il possessur Toshiba. Toshiba posseda il mument 60% da l'interpesa Landis und Gyr. Il 40% restants posseda la Innovation Network Corporation of Japan (INCJ).

RR novitads 10:00

Problems finanzials da Toshiba

Toshiba ha fatg ils ultims nov mais massivas sperditas. Els han tramess en insolvenza duas fatschentas affiliadas. Landis und Gyr è ina fatschenta da tradiziun da Zug. Ella occupa radund 5'700 persunas. Landis und Gyr duai vegnir vendì tut tenor al concurrent giapunais Hitachi u ad in'autra firma giapunaisa.