Siglir tar il cuntegn
Inhalt

Svizra Lai da fermada dal Grimsel po forsa tuttina vegnir engrondì

Il lai da fermada dal Grimsel dastga eventualmain tuttina vegnir engrondì. Il Tribunal federal ha approvà in plant da las ovras electricas Oberhasli KWO. Il cas va uss enavos a la Dretgira administrativa dal chantun Berna.

Il lai da fermada dal Grimsel.
Legenda: Il mir da fermada dal Grimsel duai vegnir auzà. Il Tribunal federal vul schluccar las leschas da protecziun. Keystone

Auzar ils mirs da fermada da l'ovra idraulica è dispitaivel perquai che la cuntrada en il nord dal lai da Grimsel è dapi il 2004 ina cuntrada da palì auta protegida. Il 2015 aveva la Dretgira administrativa bernaisa abolì la lubientscha da sanaziun. Tenor il Tribunal federal sa tracti d'ina zona a l'ur da la cuntrada da palì auta al Grimsel e il Cussegl federal possia schluccar en quest lieu la protecziun da palids.

Las ovras electricas Oberhasli èn cuntentas

Sco las ovras electricas han communitgà dettia la decisiun uss dapli spazi d’agir per il futur, ha accentuà il president dal cussegl d’administraziun, il cusseglier dals chantuns da Berna Werner Luginbühl. Las ovras electricas stoppian uss examinar la prioritad dals projects, perquai ch’il mument sajan ins era vida in project en il territori dal Susten, ha ditg Lunginbül.

Organisaziuns d’ambient èn surstadas da la decisiun

Sco las organisaziuns d’ambient scrivan sajan ellas surstadas da la decisiun da Losanna. Uss speran ellas sin la Dretgira administrativa che vegn a tractar il cas ina ulteriura giada. Il cas vegn probabel a fatschentar la Dretgira administrativa anc plirs mais.

RR novitads 14:00